Ўзбекистон президенти Шавкат Мирзиёев 22 июль куни Нурафшон шаҳридаги KRANTAS бренди остида махсус автомобиллар, ҳарбий техника ва турли механизмлар ишлаб чиқарадиган «Нурафшон махсус техника» корхонасига ташриф буюрди.

Компания 6×6 ва 8×8 ғилдирак формулали янги зирҳли транспортёрларни серияли ишлаб чиқаришга тайёрламоқда, шунингдек, йилига 10 мингтагача юк автомобили ва пикап ишлаб чиқаришни йўлга қўйишни режалаштирмоқда.

Корхонанинг икки таъсисчисидан бири Акмал Каримов «Ўзбекистон 24» телеканалига берган интервьюсида компания зирҳли техника ишлаб чиқиш билан беш йил аввал шуғуллана бошлаганини маълум қилди.

«Беш йил аввал корхонамизда биринчи марта зирҳли автомобиль ишлаб чиқилди ва тайёрланди. Биринчи модель Tarlon зирҳли автомобили бўлди», — деди у.

Унинг сўзларига кўра, машина Ўзбекистон Қуролли кучлари, Миллий гвардия ва Ички ишлар вазирлиги учун яратилган. Автомобиль бешинчи класс бўйича ҳимоя даражасига эга бўлиб, Европа ишлаб чиқарувчилари бутловчи қисмларидан йиғилган.

«Автомобилнинг конструкцияси, дизайни ва чизмалари корхонамиз конструкторлик бюроси мутахассислари томонидан ишлаб чиқилган. Яъни бу техника хорижий брендлар лицензияси асосида ёки чет элда харид қилинган лойиҳа асосида ишлаб чиқарилмаган. Лойиҳа нолдан ўзбек муҳандислари томонидан ишлаб чиқилган ва яратилган», — дея таъкидлади Акмал Каримов.

Кейинчалик корхона шаҳар шароитида фойдаланиш учун мўлжалланган, ихчамроқ Qalqon-1 ва Qalqon-2 зирҳли автомобилларини ишлаб чиқди. Улар тўртинчи класс бўйича ҳимоя даражасига эга.

Компания шунингдек, 6×6 ва 8×8 ғилдирак формулали Arslon зирҳли транспортёрларини ҳам яратди. Каримовнинг айтишича, машиналар аллақачон давлат синовларидан ўтган.

«Биз чизмаларини тайёрладик ва ушбу машиналарни ишлаб чиқардик. Ҳозир бронетранспортёрлар давлат синовларидан ўтди. Корхонамизда уларни конвейерда серияли ишлаб чиқаришни йўлга қўйишга тайёргарлик ишлари олиб борилмоқда», — деди у.

Gazeta хабартопган техник тавсифларга кўра, машиналар бўлинмаларни ташиш, уларни ўт очиш билан қўллаб-қувватлаш ҳамда хавф даражаси юқори бўлган ҳудудларда махсус вазифаларни бажариш учун мўлжалланган.

Ҳар икки модель 30 миллиметрли автоматик тўп ва 7,62 мм калибрли қўшма пулемёт билан қуролланган. Ҳар бир зирҳли транспортёр экипажи уч кишидан иборат, десант бўлими эса саккиз нафар ҳарбий хизматчига мўлжалланган. Машиналарга Cummins двигателлари ва Allison автоматик узатиш қутилари ўрнатилган.

Arslon 6×6 нинг оғирлиги 22 тоннани, узунлиги 7 метрни, кенглиги 3 метрни ва баландлиги 3,5 метрни ташкил этади. Двигатель қуввати 450 от кучига тенг, энг юқори тезлиги соатига 100 км, юриш захираси эса 650 км. Зирҳ ҳимояси STANAG 4 даражасида экани айтилган: корпус 12,7 ва 14,5 мм калибрли ўқ-дорилар зарбасига бардош беради, минага қарши ҳимояси эса тротил эквивалентида 8 кг гача бўлган портлашга мўлжалланган.

Arslon 8×8 нинг оғирлиги 33 тоннани, узунлиги 8 метрни, кенглиги 3,1 метрни ва баландлиги 3,4 метрни ташкил этади. Зирҳли транспортёр 600 от кучига эга двигатель билан жиҳозланган, соатига 105 км тезликкача чиқа олади ва юриш захираси 600−700 км ни ташкил этади. Ҳимояси STANAG 6 даражасида экани қайд этилган: машина 14,5 ва 30 мм калибрли ўқ-дорилар зарбасига, шунингдек, оғирлиги 10 кг гача бўлган заряд портлашига мўлжалланган.

Ҳар икки модель ҳам 30 даража қияликдаги кўтарилишлардан ўта олади ва баландлиги 1 метргача бўлган тик тўсиқларни енгиб ўтиш имкониятига эга.

«Нурафшон махсус техника» юк кўтариш қуввати 2 тоннадан 32 тоннагача бўлган 10 та моделдаги юк автомобилларини ишлаб чиқаришни ўзлаштиришни режалаштирмоқда.

Янги лойиҳа учун корхона Туркия, Хитой ва Европа мамлакатларидан ускуналар харид қилди. Уларни ўрнатиш ва ишга тушириш учинчи ҳамда тўртинчи чоракларга режалаштирилган.

«Шундан кейин [режага кўра] йилига 10 мингтагача юк автомобили ва пикап ишлаб чиқариш қувватига эга ишлаб чиқаришни бошлаймиз. Лойиҳа ишга туширилгач, 550 та янги иш ўрни яратилади, шунингдек, қўшимча солиқ тушумлари ҳам таъминланади», — деди Акмал Каримов.

Компания аввалроқ импорт ўрнини босувчи маҳсулотлар ишлаб чиқаришни кенгайтираётганини маълум қилган эди. Кейинги ривожланиш учун Тошкент шаҳрининг Янгиҳаёт туманида 10 гектар ҳудудда янги завод қуриш режалаштирилмоқда. Лойиҳа йилига 15−18 млн долларлик маҳсулот ишлаб чиқаришни маҳаллийлаштириш имконини бериши кутилмоқда.

Корхона шунингдек, 6×6 ғилдирак формулали 155 миллиметрли To‘fon ўзиюрар артиллерия қурилмасини намойиш этди. У қўшинларни ўт очиш билан қўллаб-қувватлаш, контрбатарея кураши, техника ва истеҳкомларни йўқ қилиш, шунингдек, аниқ зарбалар бериш учун мўлжалланган.

Тақдим этилган техник тавсифларга кўра, қурилманинг оғирлиги 27 тоннани ташкил этади, экипажи эса тўрт нафардан олти нафаргача кишидан иборат. Машинанинг узунлиги 11,7 метр, кенглиги 2,5 метр, баландлиги эса 3,8 метрга етади.

To‘fon 155 мм калибрли, замбарак узунлиги 52 калибр бўлган қурол ва 18 та ўқ-дорига мўлжалланган жанговар захира билан жиҳозланган. Қўлланиладиган ўқ-дори турига қараб ўқ узиш масофаси 41−50 км ни ташкил этади, ўқ узиш тезлиги эса дақиқасига олти-етти марта. Қурилмани жанговар ҳолатга келтириш учун тахминан 30 сония талаб этилади.

Машинанинг энг юқори тезлиги соатига 100 км этиб кўрсатилган, юриш захираси — 600 км, двигатель қуввати — 335 от кучи. Ўт очишни бошқариш ва навигация учун GPS/INS сунъий йўлдош-инерциал тизими назарда тутилган.

Президент матбуот хизмати эълон қилган суратлар ва «Ўзбекистон 24» телеканали сюжети орқали модернизация қилинган Т-64 танки ҳам намойиш этилди.

Gazeta аниқлашича, машина замбарагининг узунлиги 6350 мм бўлган 125 миллиметрли 2А46 тўпи билан жиҳозланган. Жанговар захираси 37 та снаряддан иборат, эълон қилинган ўқ узиш масофаси эса 10 км гача.

Модернизация қилинган танкнинг оғирлиги 38,5 тоннани ташкил этади, экипажи — уч киши. Унинг узунлиги 6540 мм, кенглиги 3415 мм, баландлиги 2170 мм га етади. Юриш захираси 500 км деб кўрсатилган.

Танкнинг куч қурилмаси модернизация қилиниб, эскирган 5 цилиндрли 5ТДФ двигатели ўрнига Жанубий Кореянинг Doosan Infracore компанияси ишлаб чиқарган, қуввати 950 от кучига тенг DP222LC двигатели ўрнатилган.

Бу ҳажми 21,9 литр бўлган 12 цилиндрли V-шаклли дизель двигателдир. Модернизациядан сўнг танкнинг энг юқори тезлиги соатига 50 км ни ташкил этади.

Тақдимотда зирҳ ҳимоясининг қалинлиги ҳам кўрсатилган: бир участкада 80 мм, бошқа участкада эса 80+105 мм комбинацияланган ҳимоя.