Кириллчада Kecha, 17:01   Jamiyat  

Buxoro va Qashqadaryoda yer maydonlarini rasmiylashtirish evaziga pora olishda gumonlanib, ikki mansabdor ushlandi. Bu haqda Davlat xavfsizlik xizmati xabar qildi.

Buxoro viloyatida Davlat kadastrlari palatasi viloyat boshqarmasining bo‘lim boshlig‘i mahalliy fuqarodan 2,5 ming dollar olgan vaqtida qo‘lga tushgan.

DXX ma’lumotiga ko‘ra, u Romitan tumani hokimligi zaxirasidagi 65 kv. m yer maydonida 2015-yilda o‘zboshimchalik bilan qurilgan savdo va xizmat ko‘rsatish binosi hamda unga tutash 35 kv. m bo‘sh yer uchastkasini fuqaro nomiga rasmiylashtirib berishni va’da qilgan.

Qashqadaryo viloyatida esa Investitsiyalar, sanoat va savdo boshqarmasining Ko‘kdala tumani bo‘limi bosh mutaxassisi ushlangan.

Tergov ma’lumotiga ko‘ra, u 2019-yilda Chiroqchi tumani hokimi qarori bilan ajratilgan 1 sotix yer maydoni uchun kadastr hujjatlarini tayyorlab, davlat ro‘yxatidan o‘tkazib berish evaziga 1 ming dollar talab qilgan. U talab qilingan pulni olgan vaqtida DXX va Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan ushlangan.

Har ikki holat yuzasidan jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Toshkent shahri va Andijon viloyatida noqonuniy pul talab qilgan kadastr xodimi hamda yer maydonini sotmoqchi bo‘lgan fuqaro qo‘lga olingan edi.