Mae’r Dirprwy Brif Weinidog a’r Gweinidog Cabinet dros Gyfiawnder Cymdeithasol a Chydraddoldeb, Sioned Williams, wedi cyhoeddi ei bod sefydlu grŵp arbenigol i gefnogi Llywodraeth Cymru gyda’i chynllun peilot Cynnal. Fe fydd hi’n cyd-gadeirio’r grwp ochr yn ochr â Phrif Swyddog Gweithredol Sefydliad Bevan, Steffan Evans.

Mae Sefydliad Bevan wedi galw ers tro am sefydlu Taliad Plant Cymru, wedi’i fodelu ar Daliad Plant yr Alban. Mae tystiolaeth o’r Alban wedi dangos y gall darparu arian ychwanegol i deuluoedd incwm isel wneud gwahaniaeth go iawn i fywydau pobl gan godi plant allan o dlodi a lleihau caledi.

Bydd cynllun peilot Cynnal yn gweld 15,000 o blant 0–6 oed sy’n byw mewn aelwydydd sy’n hawlio Credyd Cynhwysol yng Nghymru yn derbyn £10 yr wythnos fel rhan o beilot o Daliad Plant Cymru. Wrth ymateb i’r cyhoeddiad, dywedodd Steffan Evans:

Rwy’n falch iawn o weld Llywodraeth Cymru yn bwrw ymlaen â’i peilot Cynnal. Mae’r dystiolaeth o’r Alban yn glir bod gan y polisi y potensial i wneud gwahaniaeth gwirioneddol i fywydau plant ledled Cymru, ac mae’n galonogol gweld cynnydd yn cael ei wneud tuag at sefydlu taliad tebyg yng Nghymru.

Edrychaf ymlaen at allu rhannu arbenigedd y Sefydliad ar dlodi plant yng Nghymru fel cyd-gadeirydd y grŵp arbenigol ac edrychaf ymlaen at weithio gyda’r arbenigwyr eraill a fydd yn ffurfio’r grŵp.

Mae’r Sefydliad eisoes wedi siarad ag aelodau o bob plaid wleidyddol yn dilyn yr etholiad i bwyso am dlodi plant i fod yn flaenoriaeth ac rydym ni’n edrych ymlaen at barhau i wneud hynny dros yr wythnosau a’r misoedd nesaf.