3x3ko Espainiako Kopa jokatu da egubakoitzetik zapatura Tenerifen, eta Smartlog Ointxe taldea izan da onena; Lara Gonzalez, Mama Dembele, Izar Bedia eta Irene Murua laukoteak osatutako taldeak irabazi du txapelketa."Oso pozik gaude. Uda guztian ibili gara hiruko txapelketan jokatzen eta ezin hobeto bukatu dugu. Harro gaude egin dugun lanagatik", adierazi du Irene Murua jokalariak Tenerifetik bertatik.

Jokatutako sei partiduak irabazi ditu Smartlog Ointxe taldeak: hiru jokatu zituen egubakoitz arratsaldean, bat zapatu goizean eta finalerdia eta finala zapatu arratsaldean. "Talde-lan ona egin dugu, atakean ere ondo ibili gara, baina egindako defentsa nabarmenduko nuke nik. Sekulakoa egin dugu, eta nire ustez hortxe egon da garaipenaren gakoa, egindako defentsa onean", dio Muruak.

Hauek dira jokatutako partiduetan lortutako emaitzak: lehen neurketan PBL Las Rozasen aurka, 12-10 irabazi zuen;  Vigo 3x3ren aurka 21-3; La Celeste LP2K taldearen aurka 15-9; Ceuta 3x3ren aurka 21-6; Valencia Basket 3x3 taldearen aurka 17-8 –finalerdia– eta Logroñoko Agua y Jardinen kontra 18-10 –finala–.

3x3ko Espainiako Kopa jokatzen den lehen aldia izan da; bai, behintzat, izen horrekin. Muruak azaldu duen moduan, lehen zirkuitu luze baten barruan jokatzen zen kopa hori, "baina aurten, lehenengo aldiz, bi egunetan eta izen horrekin". Hamabi taldek jokatu dute mutilen kategorian eta hamarrek neskenean. Mutilen kategorian, Pando Mataro taldeak irabazi du; Marenostrum Fuengirola izan da bigarren sailkatua.