ირაკლი კობახიძის თქმით, გიორგი ქაჯაიამ „სხვა სფეროში გადაინაცვლა და ეს თანამდებობა საკუთარი ნებით დატოვა“.

მთავრობის ადმინისტრაციაში რადიო თავისუფლებას უთხრეს, რომ ქაჯაიამ პოსტი 2025 წლის 1 დეკემბერს დატოვა. თუმცა აღნიშნულთან დაკავშირებით მთავრობის ვებგვერდზე ბრძანება გამოქვეყნებული არ არის.

ამ პერიოდში საიტზე 28 ნოემბრითა და 2 დეკემბრით დათარიღებული №319 და №321 ბრძანებებია განთავსებული. შესაძლოა, ქაჯაიას თანამდებობიდან წასვლა №320 ბრძანებით გაფორმდა.

კობახიძემ გიორგი ქაჯაია რუსეთთან ურთიერთობის საკითხებში პრემიერ-მინისტრის მრჩევლად 2024 წლის 13 მარტს დანიშნა. მანამდე იგი რუსეთში საქართველოს ინტერესების სექციას ხელმძღვანელობდა.

2012-2024 წლებში რუსეთთან პრემიერის სპეცწარმომადგენლის პოსტს ზურაბ აბაშიძე იკავებდა. ის მოსკოვთან მოლაპარაკებებს ე.წ. „კარასინი-აბაშიძის“ ფორმატში მართავდა.