26‑гадовы бельгіец Клеман Вандэнкеркхове, які раней працаваў прадаўцом аўтамабіляў, афіцыйна стаў сынам прынца Ларана — малодшага брата караля Бельгіі Філіпа. Прынц Ларан прызнаў Клемана сваім сынам і спадкаемцам, піша Бі-бі-сі.

Прынц Ларан і Клеман Вандэнкеркхове. Фота: Clément Vandenkerckhove / Instagram

Клеман — пазашлюбны сын прынца Ларана і бельгійскай спявачкі Венды ван Вантэн. Ягоную маці на самай справе завуць Ірыс Вандэнкеркхове, а Венда ван Вантэн — яе сцэнічны псеўданім. Раман паміж ёй і прынцам адбыўся яшчэ да таго, як Ларан у 2003 годзе ажаніўся з прынцэсай Клэр.

У сям'ю прынца Клемана афіцыйна прынялі яшчэ каля паўгода таму, але шырока вядома пра гэта стала толькі цяпер.

Нягледзячы на новы статус, Клеман атрымаў далёка не ўсе прывілеі членаў бельгійскай каралеўскай сям'і. Ён фармальна мае тытул прынца, але не будзе атрымліваць дзяржаўнае ўтрыманне, не ўвойдзе ў лінію спадкаемства трона і не будзе ўдзельнічаць у традыцыйных афіцыйных мерапрыемствах каралеўскай сям'і. Гэтым ён адрозніваецца ад сваіх зводных братоў і сястры — прынцэсы Луізы і прынцаў Эмерыка і Нікаля, якія нарадзіліся ў законным шлюбе Ларана і Клэр.

Клеман ужо шмат гадоў ведаў, што ягоны біялагічны бацька — прынц Ларан. Паводле яго слоў, маці расказала сыну пра гэта, калі яму споўнілася 16 гадоў. Аднак ён да нядаўняга часу не вырашыў, ці будзе карыстацца прозвішчам бацькі — Саксен-Кобургскі.

Пры гэтым малады чалавек падкрэслівае, што ганарыцца прозвішчам Вандэнкеркхове, якое носіць па маці. Ён адзначаў, што адмовіцца ад яго для яго азначала б здрадзіць таму, што маці зрабіла дзеля яго.

У 20 гадоў Клеман нарэшце адважыўся патэлефанаваць прынцу Ларану. Пасля некалькіх тэлефонных размоў яны сустрэліся. Ларан прапанаваў правесці ДНК-тэст, каб канчаткова пацвердзіць бацькоўства.

Яны разам адправіліся ў бальніцу. Прынц прапанаваў здаць аналіз першым, каб Клеман менш хваляваўся. Пазней малады чалавек атрымаў паведамленне з лабараторыі: вынік пацвердзіў бацькоўства з верагоднасцю 99,5%.

Пра гісторыю Клемана бельгійская грамадскасць ведала яшчэ да цяперашняга афіцыйнага прызнання. У мінулым годзе на мясцовым тэлебачанні выйшаў дакументальны фільм, у якім сам Клеман расказаў пра знаёмства з бацькам.

Падобная гісторыя ўжо адбывалася ў сям'і прынца Ларана. Ягоны бацька, былы кароль Бельгіі Альберт II, таксама прайшоў ДНК-тэст пасля шматгадовай судовай спрэчкі аб прызнанні бацькоўства.

У выніку ў 2020 годзе ён афіцыйна прызнаў сваёй пазашлюбнай дачкой мастачку Дэльфін Баэль. Пасля судовай перамогі Дэльфін атрымала тытул прынцэсы і стала выкарыстоўваць прозвішча Дэльфін Саксен-Кобургская.

Гісторыя з пазашлюбнай дачкой стала адной з прычын таго, што ў 2013 годзе Альберт II адмовіўся ад трона. Каралём тады стаў ягоны старэйшы сын Філіп, брат Ларана.

Як і Дэльфін, Клеман не будзе атрымліваць дзяржаўнага ўтрымання. Паводле закона, прынятага ў Бельгіі ў 2013 годзе, адпаведныя выплаты прызначаныя толькі каралю Філіпу, былому каралю Альберту II, прынцу Ларану і прынцэсе Астрыд — сястры Філіпа і Ларана.

Усе навіны →