Lur Olaizola Lizarralde (Donostia, 1988) Tabakalera Kultura Garaikidearen Nazioarteko Zentroko ikus-entzunezkoen atalaren koordinatzailea da 2015etik (erakundearen sorreratik, alegia), eta zentroko ikus-entzunezko programazioa atontzeaz eta eskaintzeaz arduratzen da. Elías Querejeta Zine Eskolan ere eman izan ditu eskolak, eta bide propioa osatu du ere zinemagile gisara.

Xulia (2019), Zerua blu (2020), Hirugarren koadernoa (2022) eta Bariazioak (2025) film laburrak zuzendu ditu, eta baita Donostia Zinemaldia, ZINEBI, Cinéma du Réel, KIMUAK bezalako agertokietan aurkeztu ere. Egun, bere lehenengo film luzea izango den proiektuan ari da lantzen, eta hain zuzen ere, Berlinale Talents Lab laborategian aritu da berau garatzen.

ZINEAn Olaizolarekin elkartu gara, eta Tabakaleraren hamargarren urteurrena abiapuntu, zinema eskaintzak izan duen bilakaeraz jardun dugu berarekin hizketan.