– Vegane i landet ligg langt etter.

Det seier professor Carlo Aall i Vestlandsforsking

Han meiner norske vegar ikkje er godt nok rusta for meir ekstremvêr, meir nedbør og større belastningar i åra som kjem.

Avdelingsdirektør i Statens vegvesen, Svenn Egil Finden, er samd.

– Det er vanskeleg å vere ueinig i det, seier han.

Samtidig meiner han det avgjerande spørsmålet er kor godt rusta vegnettet skal vere.

– Viss du skal vere førebudd på alt, heile tida, vil det ha ein veldig stor kostnad.

Ei ny kartlegging frå Noradapt og Vestlandsforsking viser kva delar av vegnettet som kan vere mest utsett fram mot 2050.

Trollstigen i Møre og Romsdal kjem høgast.

På tredje- og sjuandeplass kjem kanskje meir overraskande område: Oslo sentrum og Bergen sentrum.

Her dei ti mest utsette vegane i landet:

Forskarane har sett på fylkesvegar, riksvegar og europavegar i heile landet.

Dei har vurdert risiko for mellom anna kraftig nedbør, vind, skred, stormflo og overvatn.

Men vêr er berre ein del av reknestykket.

Forskarane har også teke med kor mykje trafikk som går på vegane, kor sårbare dei er, og kva sikringstiltak som allereie finst.

– Vi kombinerer data om klimaendringar med samfunnsendringar, seier Aall.

Difor kan ein veg i ein stor by kome høgt på lista, sjølv om han ikkje ligg i området med det mest ekstreme vêret.

I Oslo og Bergen er store mengder trafikk og infrastruktur samla på små område.

– I Oslo er det mengda trafikk som slår ut. Det er ikkje berre klima, men også korleis trafikkmengda er, at det korkar seg, seier Aall.

På Trollstigen er forklaringa annleis. Der trekkjer bratt terreng, skredfare, vind og nedbør risikoen opp.

Aall meiner kartlegginga bør brukast til å prioritere kvar pengane til sikring og vedlikehald skal gå.

Han meiner Noreg allereie har eit etterslep.

– Vi har ikkje gjort jobben med dagens klima. Dersom vi gjer den, er halve jobben med framtidas klima gjort.

Han meiner det ikkje er mogleg å byggje seg ut av alle problema.

– Det blir for dyrt å berre fortsette å byggje seg ut av problemet. Vi klarer ikkje det.

Finden i Statens vegvesen er eining i at vegnettet har eit stort behov for klimatilpassing.

Men legg til at klimatilpassing også handlar om å vere førebudd når skaden først skjer.

– Det er ein balanse i kva som er godt nok rusta. Mykje blir også gjort gjennom beredskap og ved å ha klare planar dersom noko skulle skje.