27/08/2026 Actualizado a las 20:05h.

Azken asteetan egin da Landetxe Kultur Aretoan Elizalde auzoko bigarren eskuko etxebizitza tasatu bat esleitzeko zozketa. Itxarote-zerrendaren hurrenkera ere ezarri da. 117 familia-unitatek hartu dute parte zozketan.

Etxebizitza egokitu zaionak udalaren jakinarazpena jasoko du. Etxebizitza tasatua eskuratzeko baldintza guztiak betetzen dituela ziurtatu beharko du: Oiartzunen erroldatuta egon eta etxe-premia duela ziurtatzeaz gain, diru-sarreren muga ez duela gainditzen justifikatu beharko du.

Zozketa Landetxera etorritako ikusle boluntarioarekin egin da. Lehenik etxebizitza esleitzeko zenbaki-bola atera du; ondoren, berriz, itxarote-zerrendaren hurrenkera zehaztekoa.

Joana Mendiburu alkateak eman dio sarrera zozketaren ekitaldiari. Esan du Udalaren etxebizitza plan integralaren parte dela etxebizitza tasatuen kudeaketa eta salerosketa, eta baduela berezitasun bat: etxebizitza berrien salerosketa ez ezik, bigarren eskukoena ere udalak kudeatzen duela. Neurri horrekin etxebizitza tasatu guztiak legez dagokien prezioan saltzea bermatu nahi da, eta horretarako, etxebizitzaren prezioa zehazteaz gain, udalak bere egina du eroslea izendatzeko eskumena ere.

«Udalak denbora luzea darama etxebizitzaren gaia lantzen, estrategia bat trazatzen, eta halako erabakiak eta neurriak hartzen. Gure esku dauden eskumen guztiez baliatzen ari gara desio den etorkizuneko Oiartzun irudikatu eta herritarren beharretara ahal hainbat egokituko den etxebizitza plan integrala izateko», adierazi du alkateak.

Bigarren eskuko etxebizitza tasatuen salerosketa udalaren eskumenekoa izatea ezinbestekoa da Mendibururen hitzetan «espekulazioari trabak jartzeko, herritar zaurgarrienak babesteko eta etxebizitza bizileku gisa lehenesteko».

Udalak eskumen hori bere eginez geroztiko bigarren zozketa izan da uztailekoa eta orain arte egindako bidearen balorazio positiboa egin du alkateak: «Apirileko zozketaren berri eman zenez geroztik, etxebizitza tasatuen eskatzaileen udal erregistroko izen-emateek %25 egin dute gora».

Mendibururen iritziz, horrek adierazten du badagoela beharra eta udala bere esku dagoen guztia egiten ari da horri ahal bezain fin erantzuteko.