Ehunmilak Bira egitasmoko azkenaurreko etapa burututa, ibilaldiari amaiera ematea besterik ez zaie falta Lagun Onak mendi bazkunako kideei.

Pasa den asteburuan egin zuten Beasain eta Elosua bitarteko ibilaldia. 40 lagun elkartu ziren Goierriko herritik goizari hasiera emateko. Hiru gailur zituzten aurretik: Usurbe, Izazpi eta Irimo. Tartean paisaia zoragarriekin eta Kizkitzako, Antiguako edo Santa Barbarako ermitetatik igarotzeko aukera izan zuten parte-hartzaileek. Gainera, eguraldi paregabearekin egin zituzten 32 kilometroak.

Ibilbidea osatzeko, azken etapa falta zaie orain mendizaleei. Zazpigarren eta azken etapak Azpeitira ekarriko du bueltan ekimena, baina horretarako Irukurutzeta edota Xoxote gainditu beharko dituzte, Elosua eta Azpeitia arteko ibilbidea osatuz. 25 kilometroko luzera izango du azken zati honek.

Lagun Onak mendi bazkunako kideek aurreratu dutenez, egitasmoari amaiera emateko afaria antolatuko da. Izenematearen berri nahiz azken etapako xehetasunak datozen egunetan emango dituzte.

Lagun Onak mendi bazkunak helduei zuzendutako irteera berri bat ere antolatu du. Martxoan ezinezkoa izan zen burutzea eta oraingoan, urriaren 10ean egingo dute saiakera. Mendaur tontor ezaguna bisitatuko dute, gailurrera iristeko ezohiko bidea erabiliz.

Antolatzaileek aurreratu dutenez, Eskasetik abiatuko dira, Artikutzara jaitsi eta handik Izu igotzeko. Honela, «Arantzako zirkura sartzea erdietsiko gu», esan dute. Ekaitza (1.046 m), Mendieder (1.071 m) eta Mendaur (1.131 m) mendien gailurrak zapaldu ostean, Arantzara jaitsiz amaituko dute txangoa.

Guztira, 25 kilometro eta 1.200 metro inguruko desnibela ditu ibilbideak eta «udazkeneko paisaia gorrituaz gozatzeko aukera ederra eskaintzen du», esan dute, mendizaleak animatuz. Egun horretan, irteera 07:00etan izango da.

Ohi bezala, Lagun Onak mendi bazkunaren kontu korronteko zenbakian egin behar da aurrez ordainketa, norbere izen-abizenak emanda eta ordainagiria lagunonak.ibilaldiak@gmail.com helbidera bidali beharko da gero, antolakuntzak jakin beharreko beste edozein informazio zehaztuz.

Bazkideek 13 euro ordaindu beharko dute irteera eta bazkide ez direnek, aldiz, 18 euro.

Izena emateko azken eguna urriaren 8a, osteguna, da.