18/09/2026 a las 14:38h.

Heldu da 2026ko errepideko txirrindularitza denboraldiaren amaiera Zumaiako Txirrindulari Elkartearentzat. Asteburu honetan, larunbatean, jokatuko da azken lasterketa Elgoibarren. Hortik aurrera, ziklo-krosaren eta pistako txirrindularitzaren denboraldiak hasiko dira.

Joan den igandean Zarautzen jokatu zen lasterketan, hasierako ihesaldiak erabaki zuen probaren nondik norakoa. Viveros San Anton-Marduko txirrindulariak ondoren iritsi zen multzoan sartu ziren, eta honako emaitza hauek lortu zituzten: Peru Calvo 14. postuan sailkatu zen, Jon Berasategi 19. postuan, Lukas Blanco 65. postuan eta Unai Egaña 74. postuan. Lasterketak 83 kilometro izan zituen, eta parte-hartzaileek lau aldiz igo behar izan zuten Meaga. 42 kilometro orduko inguruko batez besteko abiaduran osatu zuten ibilbidea.

Elgoibarko lasterketak itxiko du 2026ko errepideko denboraldia. Gainera, berezia izango da Viveros San Anton-Marduko hiru txirrindularirentzat: Peru Calvo, Jon Berasategi eta Lukas Blanco junior mailako azken lasterketa izango dute, datorren denboraldian Sub-23 mailara egingo baitute salto.

Txirrindularitza eskolaren deialdia

Bestalde, txirrindularitza eskolak deialdia egin du txirrindularitzaz gozatzen hasi nahi duten gaztetxoentzat. Urrian denboraldi berriari ekin ahal izateko, informazio-bilera egingo da datorren astelehenean, arratsaldeko 19:00etan, elkartearen egoitzan, Zuloaga enparantzan, udaltzaingoaren aurrean.

Deialdia 2018an edo lehenago jaiotako neska-mutilei zuzenduta dago.

Elkartearen esanetan, txirrindularitzaren bidez, gaztetxoek bizikleta menderatzen eta zirkulazio-arauak ezagutzen ikasteaz gain, talde bateko kide sentitzen, norberaren gorputza ezagutzen eta natura errespetatzen ere ikas dezakete. Horrez gain, kirolari zein pertsona gisa aurrerago eman beharreko urratsak egiteko oinarriak lantzea da egitasmoaren helburua.

Hori dela eta, txirrindularitza eskolak egitasmoan parte hartzeko gonbidapena luzatu die 2018an edo lehenago jaiotako gaztetxo guztiei.