• Mgomo wa madereva wa mabasi na malori umeanza kuathiri shughuli za wananchi katika maeneo mbalimbali, huku baadhi ya abiria wakikwama safarini na wengine kukosa fursa muhimu, ikiwamo usaili wa kazi.

Iringa/Mwanza. Ndoto ya kupata ajira imeanza kuyeyuka kwa binti mmoja baada ya mgomo wa madereva kumkwamisha mjini Iringa na kushindwa kuendelea na safari ya kwenda Dar es Salaam ambako alikuwa na usaili wa kazi.

Binti huyo, ambaye ameomba jina lake na taasisi aliyokuwa akielekea kufanya usaili zisifahamike, amesema usaili huo ulikuwa muhimu kwake kwa kuwa aliutazama kama fursa ya kubadilisha maisha yake.