Egunak daramatzat poema buruan dabilkidala. 

Iragan larunbat goiza zen. Eguraldi zoragarria. Ezkontzaren bat ospatzen zen, antza, herriko plaza jendez lepo zegoen eta. Plaza inguruan genbiltzala jaso genuen deia: agurtu nahi bagenuen bizkor joan gintezela.

Arotzek lan dagite, zahar eta gazteak: ohea batak badagi, hilkutxa besteak.

- Arren, ohea bukatu nasai lo dagidan bihotzean poza zaidan maiteaz batera…

- Geldiro hilkutxa egin. Eder zait bizitza…

- Ene arotz gaztea, ekin beharrari. Hain maite dudan ohea itxi amaituta. Arotz zahar horrek berriz alde egin lanari…

Arotzek lan dagite, zahar eta gazteak: ohea batak badagi, hilkutxa besteak…

Ezkonberrien bizitzeko grina alde, batetik; heriotzari diogun beldurra, bestetik.

Oraingoan ere arotz zaharrak isil-isilik egin du bere lana, guk nahi baino lehenago; bizi-legea, finean. Etxekoontzat Luis, aitta edo aittajaun. Lagunentzat, Anduako Luix. Maitatua izan zara bizitzan eta maitatua izango betirako oroimenean ere. Lurrak gozo har zaitzala.