29/07/2026 Actualizado a las 21:50h.

Pasa den asteburuan jokatu ziren Ordizia Hiria txapelketako finalak, eta Oianguko pilotariek denboraldiari amaiera ezin hobea eman zioten lau partidaz osatutako pilota jaialdi dotorearekin. Maila guztietako pilotariek parte hartu zuten finaletan, eta ikusleek pilotalekuan giro bikaina sortu zuten, partidez partida emozioa eta kalitatezko pilota uztartuz.

Lehen neurketan, benjamin mailako finala jokatu zen. Harri Pedrosak eta Lian Santxezek partida txukuna egin bazuten ere, Aitzol Larrañagak eta Oier Goñik erakutsitako sendotasunaren aurrean amore eman behar izan zuten. Azkenean, 20 eta 12 nagusitu ziren gorriak.

Bigarren finalean lehia estuagoa izan zen. Mattin Aranburu eta Inar Aierbe bikoteak aurkariak estu hartu zituen neurketaren zati handi batean, baina azken txanpan Markel Muguruzak eta Marko Agirrezabalak erritmoa bizkortu eta 25-18ko garaipena lortu zuten. Bereziki nabarmendu zen Marko Agirrezabalen jarduna; partida osoan maila handia erakutsi zuen, eta amaierako tanto erabakigarrietan agindu zuen. Antolatzaileen esanetan, etorkizunean jarraitu beharreko pilotarietako bat izango da azpeitiarra.

Jarraian, emakumezkoen nagusien finala jokatu zen. Hasieran, Anne Agirre eta Uxue Olano bikoteak aurkariak estu hartu zituen eta neurketa oso parekatua izan zen partida erdira arte. Hala ere, azken zatian Nahia Eizmendik eta Naiara Aldasorok beste martxa bat sartu zuten, erasoko joko eraginkorrarekin aldea handituz. Azkenean, 35 eta 20 nagusitu ziren eta txapela etxera eraman zuten.

Jaialdiari amaiera emateko, nagusien finala izan zen ikusgarriena eta lehiatuena. Josu Soberon eta Imanol Olaran 35 eta 31 gailendu zitzaizkien Aitor Gonzalez eta Miguel Escaladari, tanto ikusgarriz eta emozioz beteriko neurketan. Aurtengo txapelketak, gainera, berezitasun nabarmena izan du, kadete eta jubenil mailako pilotariak nagusiekin batera lehiatu baitira, etorkizunera begira esperientzia eta hazkundea sustatzeko asmoz. Finalean bertan ere argi geratu zen gazteen maila bikaina, bikoteetako pilotaririk nabarmenenak gazteenak izan baitziren.

Arduradunek balorazio oso positiboa egin dute aurtengo edizioaz, bai parte-hartzeari bai ikusitako joko mailari dagokienez. Gazte belaunaldiaren bilakaerak etorkizun oparoa iragartzen duela azpimarratu dute, eta horrek ilusio berezia sortzen du klubaren baitan. Orain, udako atsedenaldia hartuko dute indarrak berritzeko, baina irailean berriro ekingo diote entrenamenduei eta txapelketei, denboraldi berriari gogoz eta ilusioz heltzeko asmoz.