Ikasturtea hastearekin batera Etxepare Euskal Instituuak atzerriko unibertsitateetan bultzatzen dituen katedrek ere beren egitaraua abiatu dute. Urria eta azaroa bitarteam horietako zazpi katedrek beren jarduera akademikoaren zati handi bat garatuko dute. Horiez gain, datorren urriaren 22a beste katedra berri bat inauguratuko du Etxepare Institutuak, Esther Ferrer artista garaikidearen izena daramana, Parisko Sorbonneko Unibertsitatean.

Katedra 2025ean sortu zen eta bere helburua euskarari eta euskal kulturaru buruzko ikerketa eta hausnarketa sustatzea da, artearekin, artearekin, pentsamenduarekin eta esperimentazioarekin loturak ezarriz. Etxeparek euskal kulturaren presentzia eremu frankofonoan bultzatzeko 'Ça colle au basque' programaren baitan kokatzen da.

Gainera, aste honetan Oihana Leonet Euskal Herriko Unibertsitateko irakaslea eta ikertzailea City University of New Yorkeko Bernardo Atxaga Katedraren baitan antolatutako mintegi zikloan egongo da. Eleaniztasun garaikideari buruzko lanketa egingo du, euskararen esperientzia abiapuntu hartuta eta Latinoamerikako errealitateekin harremanak sortuz. Era berean, datorren urriaren 11an bukatuko da Ander Beristain hizkuntzalariak eta Sait Louis Unibertsitateko irakasleak Nevada Reno Unibertsitateko Jon Bilbao katedraren baitan izan duen parte hartzea. Bertan, euskal diasporaren euskararen jabekuntza, garapena eta transmisioa ikertu du.

Urriaren amaieran, berriz, Kirmen Uribe idazlea Massachusetts Amhersteko Unibertsitateko William A. Douglass Katedran egongo da, 'Mugaz gaindi idazten' programaren baitan, eta Montrealgo McGill Unibertsitateko Elbira Zipitria Katedrak gizarte-berrikuntza landuko du aurten Gorka Espiau Euskal Herriko Unibertsitateko Agirre Lehendakaria Centerreko zuzendariaren parte hartzearekin. Azkenik azaroan, Susana Truchuelo historialaria eta Cantabriako Unibertsitateko Historia Modernoko katedradunak Universidad Nacional de San Martíneko (UNSAM) Amale Artetxe Katedran parte hartuko du, XVI. eta XVII. mendeetako euskal lurraldeetako gobernantza, boterearen artikulazioa eta parte hartze politikoan oinarritutako hitzaldi, ikerketa eta bestelako jarduerekin.