Sorginorratzak, gaztetxoen kultur sormen laborategiak bigarren edizioa izango du 2026-2027 ikasturtean. Uztaileko lehen epearen ondoren, berriro zabaldu dugu izen-ematea ikasturte berriari begira azken plazak betetzeko: irailaren 20ra arte egongo da izena emateko aukera.

Azpeitiko hiru ikastetxeetako guraso elkarteetako ordezkariek abiatutako eskaintza herrikoia da Sorginorratzak. Kulturaz Kultur Kooperatibarekin elkarlanean eta Azpeitiko Udalaren babesarekin, herriko kultur dinamika oparoa babestea da proiektuaren helburua. «Kultur sormen praktikekin gure gazteengana iritsi nahi dugu ikastetxeetako hezkuntza eskaintza osatu eta aberasteko», diote bultzatzaileek.

Sorginorratzak proiektuan, kultur edukiak eta eskualdeko sortzaileak herriko gaztetxoekin harremanetan jartzen dira, batera esperientzia aberasgarriak sortzeko.

2025-2026 ikasturteko emaitza oso positiboa izan zela ikusita, sormen eskaintzarekin jarraitu nahi izan da. Gaztetxoei kultur diziplina desberdinak probatzeko eta horiekin esperimentatzeko aukera eskaini nahi diete.

Dinamoa Sormen Gunean egingo diren sormen tailerrek 2026-2027 ikasturtean ere jarraipena izango dute. 8-12 urte bitarteko haurrek hainbat diziplina artistiko ezagutzeko eta sormena lantzeko aukera izango dute, lau eremutan banatutako zortzi tailerren bidez.

Ikasturtean zehar, honako proposamen hauek egingo dira:

Gorputzaren eremuan: Magia (irailak 23–urriak 14) eta Clown (urriak 21–azaroak 11).

Hitzarenean, Kontakizunak (azaroak 18–abenduak 9) eta Bertsoa jolasa (abenduak 16–otsailak 3) izango dira.

Soinuaren eremuan, elektronika (otsailak 10–martxoak 3) eta Bideoklipak (martxoak 10–apirilak 14) saioak eskainiko dura.

Azkenik, irudiaren eremuan, zeramika (apirilak 21–maiatzak 12) eta Kale-artea (maiatzak 19–ekainak 9) izango dira.

Tailerrak asteazkenetan izango dira: LH3-LH4koek 17:15etik 18:15era, eta LH5-LH6koek 18:30etik 19:30era. Ikasturte osoko prezioa 160 eurokoa da, eta plazak mugatuak izango dira. Izen-ematea irailaren 20ra arte egongo da zabalik.