18/08/2026 Actualizado a las 19:18h.

Dantza sueltoko hiru txapelketatan parte hartu dute egunotan Jone Arriaran eta German Aranburu dantzari azpeitiarrek, eta emaitza onak lortu dituzte. Bi hitzordu izan zituzten igandean, eta beste bat astelehenean.

Igandean, Amurrion eta Laudion izan zituzten txapelketak. Lehenengoan, Amurrion, Arriaranek eta Aranburuk garaipena eskuratu zuten, eta beste hitzorduan ere maila oso ona erakutsi zuten, bigarren postua eskuratuz.

Astelehenean, berriz, helduen dantza sueltoko txapelketa jokatu zen Azkoitiko Balda plazan, Andra Mari jaietako Baserritarren Egunaren egitarauaren barruan. Guztira, zazpi bikotek hartu zuten parte, eta Jone Arriaran eta German Aranburu izan ziren txapeldunak. Emaitza hauekin, Arriaranek eta Aranburuk dantza sueltoko denboraldian erakusten ari diren maila ona berretsi dute.

Azpeitiarren nagusitasuna, gainera, podiumean ere islatu zen Azkoitiko txapelketan. Izan ere, hirugarren postua ere Azpeitira joan zen, Nora Aizpuru eta Iker Zabala bikotearen eskutik. Hala, bi bikote azpeitiarrek lortu zuten lehen hiru postuen artean sartzea.