Det er litt ekstra spenning når rivalane Aalesund og Molde møtes på grasmatta laurdag ettermiddag på Color Line Stadion i Ålesund. Til alle tider har det vore eit ekstra nederlag å tape for nabobyen - eller bygda.

Sidan Aalesund debuterte i eliteserien i 2003 har dei to laga møtt kvarandre 34 gongar. Molde har vunne 23 av dei. Aalesund har vunne fem av kampane.

AaFK-trenar Kjetil Rekdal meiner likevel det er heilt ope kven som vinn, men at det står litt ekstra på spel denne helga.

– Det er eit lokaloppgjer med litt ekstra nervar rundt det, og prestisje, sjølvsagt, seier han.

I skuggen av VM

Kampen laurdag må dei spele i skuggen av VM-kampen som går seinare same kveld.

Eirik Hestad i Molde seier det er inspirerande:

– Det er utruleg kjekt å sjå at folk ein har budd med og trent med får det til på den aller største scena mot dei beste spelarane i verda.

– Og så er det jo sjølvsagt òg veldig kult at Noreg som nasjon kan hamle opp med dei beste i verda, legg han til.

Debut for A-laget

Fleire av spelarane har møtt kvarandre i lokaloppgjer før, men ikkje alle. AaFK-keeperen får nemleg sin debut på A-laget mot Molde.

Etter at AaFK sin tidlegare keeper Kristoffer Klaesson la opp i slutten av juni, har Tor Erik Larsen blitt laget sin førstekeeper. Han seier han er klar for debuten i Eliteserien.

– Det er jo dette ein jobbar for, så ein treng ikkje vere overnervøs eller overgira.

Larsen seier han gler seg til å spele mot Molde.

– Det er jo å spele kampar som betyr noko. Det er det viktigaste i verda.

– Blir betre for kvar veke som går

Moldetrenar Sindre Tjelmeland seier det blir «perfekt» å kome i gang med Eliteseriekampar.

– Vi gler oss verkeleg. Bortekamp mot eit godt Aalesund-lag blir bra for oss, seier Tjelmeland.

Molde-kaptein Emil Breivik seier treningane under Tjelmeland har vore intense.

– Vi er ikkje der vi vil vere akkurat no, men det er ikkje langt unna, held kapteinen fram.

– Er klare for å endre på statistikken

AaFK-trenar Kjetil Rekdal seier det er på tide å pirke borti statistikken som viser at Molde går sigrande ut i dei fleste kampane mot AaFK.

– Men då må vi vere gode sjølv. Vi vinn ikkje kampar på flaks mange gonger i løpet av ein sesong, så prestasjonen vår blir avgjerande, seier Rekdal.

Før oppgjeret ligg Molde på 5. plass på tabellen med 19 poeng. Aalesund har 11 poeng, og ligg dermed på 13. plass.

Alle veit at fotballen kan overraske. Sjølv om Molde har best statistikk i lokaloppgjera dei siste 23 åra blir det spennande å sjå kven som kjem sigrande ut.

Aafk-trenaren har elles fått med seg at landslagskeeper Ørjan Håskjold Nyland no står utan klubb. Han trur likevel ikkje det er realistisk å få keeperhelten heim til Sunnmøre.

– Eg trur han har tenkt å spele på toppnivå, sannsynlegvis i utlandet, ei stund til. At han skal kome heim og spele for Aalesund på slutten av karrieren har eg ikkje tru på, seier Rekdal.