Glav-pil, glav-stank, glav-touseg, glav-kenneud, glav-beuz... a bep seurt a zo e brezhoneg evit kaozeal eus an amzer c'hleb. Dav eo lar 'vez ouzphenn nav c'hant millimetrad dour hag a gouezh b'ar vro bep bloaz. N'eo ket dister an dra se. Met gwashoc'h a zo. Hervez sifroù Météo France e vez stankoc'h ar sammad glav e Nisa (791 milimetrad dour) eget e Sant Brieg (757 dour).

"An trenioù amzer fall 'teu diouzh ar mor. Ha n'eus tra da wel gant ar mor Kreizdouarel. Du-hont teu ar glav fonnusoc'h gant an aer tomm a zo. Amañ e teu an traoù goustadikoc'h, un tamm evel un tren gazoil, kwa. Pezh a zo ez eus kalz barradoù-glav amañ a-hed ar bloaz. Setu an dra-se a zo ba spered an dud", eme Guenole Gevel a zo paotr Météo France war e leve. Gwir eo an dra-se. E Nisa vez 62 devezh glav bep bloaz e-skoaz 129,6 devezh glav e Brest.

Ha ne teu ket ar glav-se er memes mod e pep lec'h b'ar vro. "Anat eo vez muioc'h a c'hlav war ar menezioù Are, menez Du ivez, met dreistholl war Menez Are, tro 1400 milimetrad bep bloaz. War bord ar mor ez eus kalz nebeutoc'h. An dra-se zo lezennoù fizikel. Glav teu peogwir ar c'houmoul ez a lein gant ar menez. Ha ma ez a lein e teu yenoc'h. Ha ma teu yenoc'h e teu d'ober skorn. Ha diouzh ar skorn e teu ar glav. Setu muioc'h zo war ar menezioù", emezañ.

N'eus ket kalz dour dindan an douar e Breizh

Hag ur wech en em gavet ar glav war an douar ? Ouzhpenn un hanter diouti a za en-dro en aer dre cʼhwez ar gwez da skouer. Un nebeut re a za dindan douar. Met kalz nebeutoc'h eget e lec'hioù all "peogwir e Breizh ez eus roc'h ispisial. Greunit, dre vras, pe skilt. Hag abalmour d'an dra-se, n'ez a ket an dour e-barzh an douar", a zispleg Mikael Bodlore Penlaez zo douaronier.

Ha se zo kaoz neuze eo ken pouezus ar sterioù e Breizh. Kement a 30 000 kilometr a sterioù a zo e Breizh. Ha lod vrasañ 'teu eus ar menezioù. "An dour a za diouzhtu er sterioù ha bez ez eus kalz sterioù o kemmer o mammennoù e Menez Are hag e menezioù Du : Ster Aon, Ster Odet, An Elorn, Ar Blavezh.... Muioc'h a sterioù a zo e Breizh eget e lec'hioù-all e Bro C'hall. Met bihan a-walc'h int" ha mont a reont buan tre war-zu ar mor. Dre-se neuze vez graet "Kastell Dour Penn ar Bed" eus ar Menez Are.

Vous avez apprécié cet article ? Partagez‑le

Adresse e-mail (obligatoire)

Exemple : nom@email.com

Keleier : Ar reportaj

Keleier : Ar reportaj