Det var digitaliserings- og forvaltningsdepartementet som fortalde om dette i ei pressemelding fredag.

I tillegg til regelverket om digitale tenester, DSA, blir det jobba med regelverket om digitale marknader, DMA, og regelverket om kunstig intelligens, KI-forordninga, AI Act.

Direktør Mari Velsand i Medietilsynet seier det er viktig at regelverket kjem på plass så fort som mogleg.

– Det er beklageleg at gjennomføringa av desse regelverka i Noreg er forseinka. DSA er viktig for å sikre brukarane digitalt, ikkje minst gjeld det barn og unge. Derfor hastar det å få dei nye reglane inn i norsk rett, seier Velsand.

Medietilsynet blir tilsynsmyndigheit i saker som berører område som trygg bruk av digitale tenester for barn og unge, desinformasjon, valmanipulasjon og ytringsfridom på sosiale medium når regelverket blir ein del av norsk rett. Nasjonal kommunikasjonsmyndigheit (Nkom) blir nasjonal koordinator for DSA i Noreg, og Forbrukartilsynet og Datatilsynet skal saman med Medietilsynet bidra til å handheve det nye regelverket.

Statsråden til Brussel for å diskutere regelverket

Digitaliserings- og forvaltningsminister Karianne Tung understrekar i pressemeldinga frå departementet at dei største digitale plattformene opererer på tvers av landegrenser, og at samarbeid med EU og Europa er viktig for å sikre tryggare digitale tenester, særleg for barn og unge, og dessutan like konkurransevilkår for norsk næringsliv.

Regjeringa samarbeider med Island, Liechtenstein og EU-kommisjonen for å finne løysingar som gjer det mogleg å innføre DSA og følgje opp dei store teknologiselskapa på ein formålstenleg måte i Noreg.

Jobbar med innføring samtidig som det blir forhandla

Parallelt med forhandlingane går arbeidet føre seg med å førebu det norske regelverket. Departementet går gjennom innspel frå høyringar og arbeider med lovproposisjonar til Stortinget. Målet er at norske reglar skal kunne tre i kraft så raskt som mogleg etter at forordningane er innlemma i EØS-avtalen.

Medietilsynets direktør er glad for dei tydelege signala frå departementet.

– Det er bra at regjeringa følgjer opp for å få innført dei nye regelverka så raskt som mogleg, seier Velsand.

Kort om DSA:

• DSA har som mål å gi eit betre vern av rettane til brukarar av sosiale medium og andre internettenester og redusere samfunnsrisikoar.
• Det blir enklare å fjerne ulovleg innhald, varsle om innhald som bryt med brukarvilkåra og klaga til plattforma viss innlegg eller kontoar sletta.
• Forbod mot åtferdsbasert, eller målretta, marknadsføring mot mindreårige.
• Forbod mot manipulerande design, som betyr at tilbydarane ikkje har lov til å manipulere brukarane til å gjere val i strid med eigne interesser.
• Dei største internettplattformene blir pålagde å gjere risikovurderingar for spreiing av ulovleg innhald og for grunnleggande rettar som personvern og ytringsfridom, under dette informasjonsfridom og pressefridom.
• Aktørane skal også gjere risikovurderingar knytte til valmanipulasjon, uønskt påverknad av den offentlege samtalen og av den fysiske og psykiske helsa til brukarane.
• Det blir særleg lagt vekt på å verne barn og unge mot skadeleg innhald og å førebygge at barn utviklar avhengnad.
• Det er bestemt at Nasjonal kommunikasjonsmyndigheit (Nkom) blir nasjonal koordinator for DSA i Norge, og at også Medietilsynet, Forbrukartilsynet og Datatilsynet skal bidra til å handheve det nye regelverket.
• Regjeringa foreslår i lovforslaget at dei myndigheitene som allereie har ansvar for tilsyn på område som blir regulerte i forordninga, skal ha ei tilsynsrolle etter den nye lova innanfor dei respektive ansvarsområda sine.

  Abonner på nyheter (RSS)