Fristen for å søke tilskott er 28. januar 2026.

– Tilskottsordninga er eit viktig verkemiddel for å sikre eit breitt og mangfaldig lokalt medietilbod over heile landet, seier avdelingsdirektør Hanne Sekkelsten i Medietilsynet.

Om lag halvparten av potten blir sette av til digitalisering av lokalradio

Digitaliseringsstøtta skal bidra til å lette overgangen frå FM-sendingar til sendingar på DAB og andre digitale flater for lokalradio. Overgangen til digitale sendingar er krevjande for lokalradio, og medfører utgifter som særleg dei minste radioane vanskeleg kan dekke aleine.

Det blir gitt både driftsstøtte til digitalisering og støtte til utbyggarar av digitale lokalradionett.

Støtte til podkast og ikkje-direktesendt bildeprogram

Tilskottsordninga omfattar også programstøtte til podkast og bildeprogram for eit lokalt publikum, som ikkje blir sendt direkte. Stadig meir konsum av levande lyd og bilde skjer ikkje-lineært.

– Slike tilbydarar har ein spesiell appell til unge målgrupper, og vi håpar at fleire lokale podkast og bildeprogram som ikkje blir sendt direkte kan kvalifisere for støtte i 2026, seier Sekkelsten.

I tillegg til å søke om støtte til digitalisering og programproduksjon, kan det søkast støtte til kompetanse- og utviklingsprosjekt. Lokalradioar for etniske og språklege minoritetsgrupper og nasjonale bransjeorganisasjonar kan vidare givast driftstilskott.

Du kan lese meir om støtteordninga i vår reviderte rettleiar på Medietilsynets nettsider her.

  Abonner på nyheter (RSS)