1976 сыллаахха Павел Пинигин кыһыл көмүс, Роман Дмитриев уонна Александр Иванов үрүҥ көмүс мэтээллэри аҕалтааннар, Сахаларын сирин аар-саарга аатырдыбыттара. Оччолорго бары да, тустуунан олорбуппут. Акыйаан нөҥүө Канада Монреаль куоратыгар буола турар Олимпийскай оонньуулар көҥүл тустууга көбүөрүттэн күннэтэ уолаттарбыт хайдах тусталларын истэ-билэ охсоору, араадьыйа, хаһыат  сонуннарын долгуйа кэтэспиппит.

70-с сылларга араас улахан түһүлгэлэргэ наар кыайыы аргыстаах буоланнар, уолаттарбытыгар олус эрэнэрбит. Олимпиада көбүөрүгэр бииртэн-биир кыайыылары аҕалтыылларыттан, бэйэбит кыайан иһэр курдук дохсуннук сананарбыт. Японеһы хотон иһэр Романы, сэрэтии биэрэннэр устубуттарыгар кыһыйыы, абаккарыы улахан этэ. Иккис кыһыл көмүһүн аҕалыахтааҕа хаалбыта. Александр үрүҥ көмүһэ кыһыл көмүскэ тэҥнээҕэ. Онтон, Павел финалга американеһы лаппа хотон, тустууну таптааччылары сөхтөрөн, кыһыл көмүһү ылбытыгар, барыбыт улуу дьолбутунан буолбута! Саха тустуута өрөгөйдөөбүтэ! Саха сирин, норуотун  дьылҕата, кэскилэ түстэммитэ. Бөҕөстөрбүт ситиһиилэрэ улахан суолталаммыта.

2026 сыл от ыйын 31 күнүгэр, “Триумф” спорт уораҕайын тэлгэһэтигэр, Монреаллааҕы XXI Олимпийскай оонньуулартан ССРС көҥүл тустууга сүүмэрдэммит хамаандатын бөҕөстөрө Павел Пинигин, Роман Дмитриев уонна Александр Иванов үс мэтээллэри аҕалбыт 50 сыллаах Өрөгөйдөрүгэр аналлаах үөрүүлээх дьоро түгэн тэрилиннэ.

Өрөспүүбүлүкэ спортивнай общественноһын, бэтэрээннэри сэргэ, Роман Михайлович Дмитриев огдообото Антонина Софроновна Дмитриева, Александр Николаевич Иванов эрэллээх кэргэнэ Варвара Афанасьевна Иванова кыттыыны ыллылар. Эҕэрдэ тыллар, ахтыылар дуораһыйдылар.

Саха Өрөспүүбүлүкэтин физическэй культураҕа уонна спорка миниистирин э.т. Гаврил Михайлович Мохначевскай Монреаллааҕы Өрөгөй суолтатын, аан дойду спордугар аҕыйах ахсааннаах, күүстээх, тулуурдаах саха омук диэн ыраах хоту сиргэ баарын биллэрбиттэрин; бастакы кыһыл көмүс мэтээли 1972 с. Мюнхеннээҕи Олимпиадаҕа Роман Дмитриев аҕалбытын; улуу тренер Дмитрий Петрович Коркин  улахан кыайыыларга тиэрдибитин; Саха Өрөспүүбүлүкэтин Аҕа Баһылыга үс бөҕөс Өрөгөйдэрүгэр аналлаах дьаһаллар тустарынан таһаарбыт Дьаһалларын; үөрүүлээх быһыыга-майгыга киэҥник бэлиэтээһин “кульминацията” Д.П. Коркин Норуоттар икки ардыларынааҕы турнирыгар буолуохтааҕын; А.Н. Иванов үбүлүөйдээх 75 сааһа бэлиэтэммитин, Р.М. Дмитриев Норуоттар икки ардыларынааҕы турнира, П.П. Пинигин Бүтүн Россиятааҕы турнира ыытыллыбыттарын; Павел Павлович Пинигин Москваҕа буола турар көҥүл тустууга чемпионатыгар Саха сирин сүүмэрдэммит хамаандатыгар сүбэ-ама, көмө-тирэх буола сылдьарын тустарынан иһитиннэрдэ.

Монреаллааҕы Олимпийскай оонньуулар үрүҥ көмүс призера, ССРС спордун үтүөлээх маастара Александр Николаевич Иванов саха үс бөҕөһүн кыайыылара саха норуотун бүттүүнүн кыайыыларынан буолбутун, Олимпийскай оонньууларга кыттыбытынан киэн туттарын, махталын тренеригэр Д.П. Коркиҥҥа, доҕотторугар Роман Дмитриевкэ, Павел Пинигиҥҥэ аныырын; ситиһии кэлэрэ тустаах спортсмен хараахтарыттан, санаатын күүһүттэн, кыайыыга дьулууруттан, ис бэрээдэгиттэн тутулуктааҕын; сыыһаны-халтыны, итэҕэһи-быһаҕаһы кириитикэлээһини, сэмэлээһини өйдөөн, ырытан, ылынан, таба туһаныллыахтааҕын; билигин олимпиада мэтээлэ кэлбэтиттэн дьон хомойоро оруннааҕын; кириитикэлээччилэри кытта сөптөөх үлэ ыытыллыахтааҕын; сахалар үлэ-олох араас эйгэлэригэр дьоҕурдаахтарын; мэтээллэр кэлэллэригэр эрэнэри туһунан эттэ: “Үһүөн мэтээллээх кэлбиппит “уникальнай”, Дмитрий Петрович үс иитиллээччилэрэ этибит. Аан дойдуга буола, хатылана илик түгэн. Роман, Павел, мин буоламмыт үһүөн сомоҕолоһон, өйөһөн, Өрөгөйгө тиийбиппит. Билигин сомоҕолоһон, өйдөһөн үлэлээһин суоҕуттан мэтээл кэлэ илик. Кыттыны эрэ ылыы, “участие” диэн термин муодаттан тахсыбыта ыраатта. Мэтээл хайаан да кэлиэн наада. Ол, биллэн турар, ыарахан. Кыайыы чэпчэкитик кэлбэт. Олипиада үрдэлигэр тахсыы “барьердарын” туоруохха наада. Бу туран санаатахпына, ааспыт суолбун иккистээн хатылаабаппын. Олимпиадаҕа тиийии наһаа ыарахан этэ. Ыарахаттар барыбытыгар бааллар, элбэхтэр. Олору туорааһын тустаах спортсментан бэйэтиттэн тутулуктаах. Элбэх хаачыстыба ирдэнэр. Баҕа санаам, саха норуота бүттүүнэ, ыччаттарбыт ситиһиилэниэхтэрин баҕаралар. Ол туоллун, кыайыы, мэтээл кэлиэҕэ!”.

Спорка албан аат Музейын дириэктэрэ, Д.П. Коркин иитиллээччитэ, көҥүл тустууга ССРС спордун маастара Михаил Егорович Друзьянов олимпийскай мэтээллэр кэлиилэрэ Д.П. Коркин үлэтин түмүгэ буоларын; улуу тренер 100 сыллаах үбүлүөйүн көрсөргө бэлэмнэнии бара турарын, төрөөбүт алааһыгар балаҕанын, тэлгэһэтин сөргүтүүгэ үлэ барыахтааҕын; Д.П. Коркин огдообото, Дмитрий Петровиһы олоҕун устата өйөөбүт Александра Семеновна быйыл 90 сааһа бэлиэтэниэхтээҕин; үгүс дойдулар, улахан омуктар олимпийскай мэтээллэрэ суохтарын, саха үс бөҕөһүн Өрөгөйдөрө оччонон күндүтүн,  сыаналамматын санатта.

Саха норуотун артыыһа, эстрада сулуһа Владимир Ильич Заболоцкай 1972 с. Роман Дмитриев Мюнхеннээҕи Олимпийскай оонньууларга ылбыт кыһыл көмүс мэтээлин көмүс ууһа Степан Николаевич Попов үтүгүннэрэн оҥорбутун аҕалан көрдөрдө: “Уолаттар тусталларын көрөр этим. Сэргэх хамсаныылардаах хапсыһыылары көрдөрөллөрө, кыайыы-хотуу аргыстаах буолаллара. Киһи эрэнэр тустууктара этилэр. Биһиги, “ыалдьааччылар” баҕа санааларбытын толороллоро астык уонна үөрүүлээх буолара. 1976 сыл сайыныгар  армияҕа сулууспалыы сырыттахпына, саллаат доҕотторум сүүрэн кэлэн: “Твой земляк якут борется!”- диэбиттэригэр казарма Кыһыл муннугар сүүрэн тиийэн телевизоры көрбүтүм, Саашка японеһы кытта туста аҕай сылдьар эбит. Хардарыта бырахсыы бөҕө, өрө ытыллан олороллор. Бүтэһик түһүмэххэ киһим олох быстан хаалла. Сэниэтэ эстэн хаалбыт этэ гынан баран, олох киирэ турар этэ. Кэлин истибитим, хамаандаҕа ылбаккалар, түһэрбит ыйааһынын уһуннук тутан, онтуката ол бүтэһик хапсыһыытыгар дьайан “биллэрбит” эбит. Кыайан испитэ ээ, онтон ситтэрбитэ. Уһун баттахтааҕа, баттаҕа бурҕаҥныырын өйдүүбүн. Этиэм этэ, Ойуунускай тылларынан: “Үс саха төрүөҕэр, үөрүүлээх күнүгэр, мин аатым ааттаныа, мин ырыам ылланыа!”. Үс саха үөрүүтүгэр үс саха Олимп үрдэлигэр тахсан турбуттара! Үс саха! Ойуунускай эппитэ кэлэ турар. Аныгы үйэ тустуук уолаттарыгар ситиһиилэри баҕарабын!”.

Түмүккэ, үөрүүлээх, дьоро түгэн кыттыылаахтара ССРС, РСФСР, Саха АССР Үтүөлээх  тренерэ, Саха АССР Үтүөлээх учуутала Дмитрий Петрович Коркин иитиллээччилэрин, Олимпийскай чөмпүйүөн Роман Михайлович Дмитриев өйдөбүнньүк памятниктарыгар сибэкки дьөрбөлөрүн уурдулар. Саха бөҕөстөрүгэр уонна тренергэ албан аат!

Баһылай Посельскай