Osoko bilkura egingo du Hernaniko Udalak gaur, 18:00etan. Ekaineko akta onartu, eta dekretuen berri emandakoan, Udalaren plan ekonomiko-finantzarioa indargabetzeko proposamena, Udal eraikin batzuen garbiketa zerbitzuaren kontratuaren esleipena, eta Gipuzkoako Bertsozale Elkartearekin hitzarmena mahaigaineratuko dira, eta mozioei ekingo zaie ondoren: EAJren eta PSE-EEren 'Betiere Ertzaintza eta Udaltzaingoaren defentsan' deritzona, eta Elkarrekin Podemosena, haur eta animaliekin errespetagarriak diren udal jaiak bultzatzeko mozioa.

Gobernu Planaren betetze- mailaren balantzea

Legealdiaren hiru laurdenak beteta, Gobernu Planaren betetze-mailaren balantzea egin du Udalak. Planean aurreikusitako 135 neurrien %89 «amaituta edo bideratuta» dagoela esan du Udal gobernuak. Etxebizitzaren arloan, Udalak nabarmendu ditu Hernani etxebizitza gune tentsionatu izendatu izana eta Florida auzoko garapena bidean dagoela. Kulturaren eta hirigintzaren arloan, Kultur ekipamendu berriaren ideia-lehiaketa amaitu da, eta Ezkiaga eta Izpizuaren «bulebarizazioaren» proiektua zein Lizeagako parkearen eta aparkalekuen berrantolaketa egingo da. Herri lanetako aurrerapenak nabarmendu ditu Udalak ere, hala nola, Osinaga eta Santa Barbarako bideak, kirolaren arloan rokodromo berria, eta Portu-Elizatxoko urbanizazioa, besteak beste. Trantsizio ekosozialaren eta burujabetzaren kasuan, Udal eraikinen autosufizientzia energetikorako lanei jarraipena eman zaie, eta Udalak Karabeleko lurrak erosi ditu Nekazaritza eskola garatzeko. Azkenik, bizi kalitatea hobetzeko gizarte politikak ere sendotu dira.