Вазирлар Маҳкамасининг 17.09.2026 йилдаги 498-сон қарори билан Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги тўғрисидаги низом тасдиқланди.

Ҳужжат билан қуйидагилар белгиланди:

• Агентлик фаолиятини ташкил этиш тартиби;

• Агентликнинг ҳуқуқ ва мажбуриятлари;

• Агентлик ва унинг марказий аппаратининг вазифалари ва функциялари;

• Агентлик фаолияти самарадорлигини баҳолаш мезонлари.

Агентликнинг асосий вазифалари:

• таълим муассасаларига кириш имтиҳонларини ташкил этиш ва натижаларини баҳолаш, танловлар ўтказиш;

• миллий тест тизими асосида малака имтиҳонларини ўтказиш ва давлат намунасидаги миллий сертификатлар бериш;

• тест топшириқлари, саволлар банки, баҳолаш мезонлари, спецификациялар, кодификаторлар ва бошқа баҳолаш воситаларини ишлаб чиқиш ва такомиллаштириш;

• раҳбар кадрлар ва масъул лавозимларга тайинланган шахсларнинг давлат тилини билиш даражасини текшириш;

• ўрта, касб-ҳунар, олий таълим, хорижий мамлакатларда кадрларни қайта тайёрлаш ва малакасини ошириш тўғрисидаги ҳужжатларни тан олиш, шунингдек, таълим муассасалари томонидан берилган расмий ҳужжатларга апостил қўйиш;

• буюртма асосида билим ва кўникмаларни баҳолаш учун имтиҳонларни ташкил этиш ва ўтказиш;

• ўз ваколатлари доирасида қонунчилик ҳужжатлари доирасида халқаро ва хорижий ташкилотлар билан ҳамкорликни ривожлантириш.

Ҳужжат Қонун ҳужжатлари маълумотлари миллий базасида эълон қилинган ва 18.09.2026 йилдан кучга кирди.

                      Лола Абдуазимова