Zezenak eta honen inguruko ikuskizunek protagonismoa hartzen dute Azpeitiko Zezenbeltz Asteburuan. Urriaren 17an eta 18an izango da aurten eta Zezenbeltz elkarteak, ohi bezala, hainbat ekitaldi eta ikuskizun antolatu ditu egun horietarako. Urriaren 17an, zapatuan, sokamutur txikiak eta Grand Prix saioak hartuko dute protagonismoa. 12:30ean, Erdikaletik abiatuko da txikitxoen sokamuturra, plazara. Ondoren, zezen txikiak eta pottokak izango dira plazan. 17:00etan izango da gero Grand Prix saioa, zezen plazan.

Grand Prixerako sarrerak salgai daude jada herriko hainbat puntutan, 5 euroren truke. Aurrez erosi nahiz gero, Berdie, Jim Clark, Mendizabal, Pastorkua edo Eguzkitza tabernetan lor daitezke. Egunean bertan ere ipiniko dituzte sarrerak slagai, zezen plazako leihatilan bertan.

Igandean, urriaren 18an, ere zezenaren inguruko festak jarraituko du. 12:30ean, txikitxoen bigarren entzierroa egingo da. Ohi bezala, Erdikaletik abiatuko dira eta plazaraino egingo dute lasterketa saioa, zezen txikiekin. Behin han, jolaserako tartea izango dute abereekin. Ordu berean, paella dastaketa egingo da plazan.

Arratsaldean, helduentzat entzierroa izango da. 17:15ean hasita, Hartzubiatik plazara eramango dute zezena eta alderantziz, plazatik berriro bueltan Hartzubiara ekarriko dute.

Ondoren, zezen bolaztatuak izango dira. Antolatzaileek zehaztu dutenez, 16 urtetik gorakoentzat izango da ekitaldia.

Jendetza bildu ohi dute urtero Zezenbeltz asteburuko ekitaldiek. Zezenbeltz elkarteak antolatu ohi du festa, Azpeitiko Udalaren laguntzarekin.