No kan skipsvask avsløre framande artar som er på veg til Noreg. Det kjem fram i ein rapport frå Norsk institutt for naturforsking (NINA).

Skipsfarten er hovudårsaka til at framande artar spreier seg i verda. Artane klamrar seg til skroga på skip og snik seg inn i Noreg, og truar dermed naturmangfaldet.

– Vi håper vi kan bruke dette som ein overvakingsmetode for å finne nye framande artar på veg inn i norsk natur. Då vil det kanskje vere mogleg å stoppe dei tidleg og gjere noko før artane spreier seg overalt. Då kan vi også forstå risikoane vi står overfor, seier seniorforskar i NINA, Frode Fossøy.