Na cafetería Eros de Mieres de va munchos años entré cola camiseta del Betis, el día que xugaba col Real Madrid. Naquel templu madridista –arrodiáu tamién d'amigos que lo yeren– pude ver como, casique al final del partíu, el Betis ganaba. Por eso dicía enantes que taba arrodiáu d'amigos, porque metese nun llugar d'esos cola camiseta contraria nun ye un actu de ser valiente, sinon de ser faltosu. Y como esa ye una de les esencies del ser asturianu, los amigos, que son tan faltosos como yo, acaben perdonándotelo.

Asina yera l'Eros hasta esti sábadu qu'echó'l pieslle. Con Lelo al frente, depués de 55 años, y con Celsa, la so fía, que tomaba'l relevu, pero al tener tamién La Taberna TheWhiteBar, el trabayu disparábase-y y acabó escoyendo esti últimu. Una montonera d'amigos, conocíos y clientes xuntámosnos pa la despidida. Bien dellos tenían una montonera de recuerdos asociaos al llugar. El míu, dende bien guaje, cuando diba al institutu, y al salir de clase topaba na terraza dacuando a mio padre y a mi madre, que m'acababen invitando a una Mirinda.

La cai El Viciu tá dexando, pasu ente pasu, de ser la cai El Viciu. Oficialmente primero fue Conde de Guadalhorce y depués La Vega, pero siempre siguió siendo pa tolos mierenses y los de fuera la cai El Viciu. El Eros abrió en 1971, más o menos cuando'l Tino's, que taba a cincuenta metros (lo que ye agora'l Planta 14). Dende'l 68 yá venía funcionando el Baby's y convirtiéndose nuna referencia pa toa Asturies. Per ellí pasó tol mundu. Como depués diba pasar con Il Gattopardo, qu'abriría al añu siguiente. Ensin escaecer que, dende'l 68 taba abiertu na mesma cai, un cientu de metros enantes, el Capri Pop (que yera la remodelación del Capri qu'abriera en 1968 y que tovía enantes se llamara El Porvenir).

Nel Eros, amás de mio padre y mio madre, paraben munchos padres y madres de la quinta a tomar el vermú, pero más que nada paraba toa una xeneración nueva que se xuntaba cola afición común del hockey. Tovía esti sábadu últimu, 55 años depués, el dj que ponía música yera Mateo, porteru del hockey, y un mozu que tien más o menos los mesmos años que yo tenía cuando topaba na terraza a mios padres.

Llevamos tiempu asistiendo al cierre de llugares únicos pa esti Mieres. Recuerdo que, cuando cerró'l Baby's, abrí un expediente col popósitu de declaralu Bien d'Interés Cultural. Nel ayuntamientu nun me mataron de milagru. El conceyal d'urbanismu díxome que, polo menos, presentara l'expediente traducíu. Porque cometiera'l pecáu d'escribilu n'asturianu. Al pidime traducción- y yo, pa eso, soi mui educáu-, traduxe l'expediente al inglés y mandé-ylu. Él tamién s'alcordó muncho aquel día de mio padre y de mio madre.