La policía nun intervenía. La droga nun yera problema. Tolo contrario. Son los años 80. Mieres yera California. Asina lo contaba Quilino'l de Polio (Aquilino Fernández): «La policía tenía bastante entretenimientu con torturar a xente del sindicatu y del PC. A mi en Mieres dióme d'hosties Arce. Cuando me llevaron a Uviéu, llevéles de Palacios. El que mandaba en toos yera Claudio Ramos. A primeros de los 70 mandáronlu al País Vascu a lluchar contra ETA. Nun consiguió nada, yera mui inútil. Nesos años yera l'encargáu de tolo relacionao coles drogues n'Asturies. Pa nun facer nada. Destináronlu al País Vascu pa lo mesmo: pa facer menos que nada. Mientres más se-yos drogaran los guajes, meyor».

Yá falara d'ello'l llibru 'Grupos Autónomos', de Joni D, d'esta connivencia nos 70 en Barcelona. Defendió la hipótesis de que la meyor manera d'acabar col movimientu anarquista fue la diseminación planificada d'heroína. Cuenta, igualmente, que'l sistema funcionó tan bien que s'exportó al País Vascu: «Casualmente o no, un año después de la llegada de Francisco Álvarez, el jefe de la brigada Antianarquista barcelonesa a Bilbao».

Nel País Vascu contólo nes sos memories, 'Pasión por Euskadi', el lehendakari Ardanza. De la que yera alcalde d'Arrasate a finales de los 70, encargó-y al xefe de la Policía Municipal, José Luis Etxeberria, qu'investigara la distribución de droga nel pueblu. El siguimientu de coches con matrícules falses llevó a la policía local a dos cuarteles de la Guardia Civil: el d'Intxaurrondo en Donostia y el de La Salve en Bilbao. El propiu Etxeberia contábalo en Berria: «No es casualidad que la Guardia Civil eligiera un pueblo como Arrasate para repartir droga: dirigentes de ETA, políticos de renombre, cooperativas… Era un pueblo de gran fuerza política, social y económica. Lo eligieron a propósito».

Malcom X yá lo contara falando del Nueva York de los 60 en 'By Any Means Necessary': «L'home que controla'l tráficu de drogues siéntase nel Ayuntamientu o na sede del Gobiernu». Y tien a la policía como cuerpu de seguridá. Siempre contaba que l'exemplu más cercanu diéranlu los xaponeses enantes d'ocupar Manchuria. Cuéntalo Terence McKenna en 'El manjar de los dioses', cuando diz que produxeron grandes cantidades d'opiu y heroína pa distribuyila nel interior de China nun «intento de crear los suficientes adictos como para romper de un modo eficaz la voluntad del pueblo chino y su resistencia a la ocupación».

La hestoria en Mieres cuéntala bien de xente. Va unos díes, recomendábame Carlos, cocineru de La Llera, en plena cai El Viciu de Mieres, que viera le película 'El sustituto', d'Óscar Aibar. Nuna escena cuéntase como planificó la policía echar a los xitanos de Dènia que vivíen en primera llinia del mar: distribuyéndo-yos heroína. Consiguiéronlo. Agora ye too xalés.