«Haserre» agertu da Hernaniko PSE-EE, «presoen aldeko manifestazioa ekainaren 24ko San Joan jaietako egitarauan sartuta dagoelako». Udal talde sozialistak deitoratu du «bazterketarik gabe» sartu izana, «herritar guztientzat izan beharko lukeen egitarauan». Horregatik dio jaiak ez direla «inklusiboak», eta hernaniarren zati haundi bat «kanpoan» uzten dutela. «Pena da gure jaietan denok parte hartzeko saiakerarik ez egitea. Pertsona askorentzat sentikorra da gaia, eta errespetu haundiagoz zaindu beharko litzateke gobernu taldeak jaien programa ofizialean jasota eskaintzen duen aterki moduko hori».