మధ్యప్రదేశ్‌లోని గ్వాలియర్‌లో తమ మొబైల్ ఫోన్ లాక్కొని పారిపోతున్న ఒక ముస్లిం వ్యక్తిని ఇద్దరు అక్కాచెల్లెళ్లు వెంబడించి పట్టుకొని కొడుతున్నారంటూ ఒక వీడియో (ఇక్కడ & ఇక్కడ) సోషల్ మీడియాలో ప్రచారంలో ఉంది. దీంట్లో ఎంత నిజముందో ఇప్పుడు చూద్దాం.

ఆర్కైవ్ పోస్టుని ఇక్కడ చూడవచ్చు

క్లెయిమ్: మధ్యప్రదేశ్‌లోని గ్వాలియర్‌లో ఫోన్ దొంగతనం చేసిన ముస్లిం వ్యక్తిని ఇద్దరు అక్కాచెల్లెళ్లు వెంబడించి పట్టుకున్న దృశ్యాలు.

ఫాక్ట్: ఈ ఘటనలో పట్టుబడిన నిందితుడి పేరు మన్‌ప్రీత్ సింగ్. ఇతను ముస్లిం కాదని, పంజాబ్ రాష్ట్రానికి చెందినవాడని స్థానిక పడావ్ పోలీసులు స్పష్టం చేశారు. కావున, పోస్టులో చేయబడిన క్లెయిమ్ తప్పు.

ముందుగా వైరల్ వీడియోలోని దృశ్యాలను రివర్స్ ఇమేజ్ సెర్చ్ చేయగా, ఈ ఘటనకి సంబంధించిన పలు వార్తా కథనాలు(ఇక్కడ, ఇక్కడ & ఇక్కడ) లభించాయి. వీటి ప్రకారం, 08 ఆగస్ట్ 2026న మధ్యప్రదేశ్‌లోని గ్వాలియర్‌లో హర్షిత అగర్వాల్, రషిత అగర్వాల్ అనే ఇద్దరు అక్కాచెల్లెళ్లు స్కూటీపై వెళ్తున్న సమయంలో బైక్‌పై వచ్చిన ఒక వ్యక్తి వారి ఫోన్ లాక్కున్నాడు. హర్షిత, రిషిత అతన్ని వెంబడించి పట్టుకొని స్థానిక పోలీసులకి అప్పగించారు. దీనికి సంబంధించిన FIR కాపీని ఇక్కడ చూడవచ్చు.

నిందితుడి పేరు మన్‌ప్రీత్ సింగ్ అని, అతను పంజాబ్ నుంచి వచ్చాడని స్థానిక పడావ్ పోలీసు విచారణలో వెల్లడైంది. ఇదే విషయం గురించి పడావ్ పోలీస్ స్టేషన్‌ను సంప్రదించగా, SHO శైలేంద్ర భార్గవ మాట్లాడుతూ, నిందితుడి పేరు మన్‌ప్రీత్ సింగ్ అని, అతని తండ్రి పేరు జస్పాల్ సింగ్ అని, వారు ముస్లిం మతస్థులు కారని స్పష్టం చేశారు.

చివరిగా, వైరల్ వీడియోలో ఫోన్ దొంగతనం చేసి పట్టుబడిన వ్యక్తి ముస్లిం కాదు.