Атырау облысы полиция департаментінің бастығы Оңал Бекеев қызметтік іссапармен Исатай ауданына барып, полиция бөлімдерінің жұмысымен танысты, - деп хабарлайды Polisia.kz.

Іссапар барысында Жанбай полиция бөлімшесінің қызметі, материалдық-техникалық базасы және азаматтарға көрсетілетін қызметтердің сапасы зерделенді. Қызмет барысында туындаған өзекті мәселелер талқыланып, жұмысты жетілдіруге бағытталған нақты тапсырмалар берілді.

Сонымен қатар департамент бастығы аудан тұрғындарымен кездесіп, олардың өтініштері мен ұсыныстарын тыңдады. Кездесуде қоғамдық тәртіпті сақтау, жол қауіпсіздігін қамтамасыз ету және құқық бұзушылықтардың алдын алу мәселелері көтерілді. Тұрғындар тарапынан түскен өтініштер бойынша жауапты қызметкерлерге тиісті тапсырмалар жүктелді.

Бұдан бөлек, аудандық полиция бөлімінің жеке құрамымен өткен жиында қоғамдық қауіпсіздікті қамтамасыз ету, заңдылықты сақтау және профилактикалық жұмысты күшейту бағыттары қаралды.

Іссапар қорытындысы бойынша қызметтік міндеттерін мінсіз атқарып жүрген бірқатар полиция қызметкерлері, сондай-ақ қоғамдық қауіпсіздікті қамтамасыз етуге белсенді үлес қосқан тұрғындар марапатталды.