Атырау облысы полиция департаменті бастығының орынбасары Ернар Базаров Индер ауданындағы "Жас Өркен" лагерінің тәрбиеленушілерімен кездесті, - деп хабарлайды Polisia.kz.

Кездесу барысында балаларға қауіпсіздік ережелерін сақтау, құқықтық сауаттылықты арттыру және құқық бұзушылықтардың алдын алу бойынша түсіндіру жұмыстары жүргізілді. Полицейлер бала қауіпсіздігі басты назарда екенін атап өтіп, кез келген жағдайда сақтық танытып, заң талаптарын сақтаудың маңыздылығын түсіндірді.

Іс-шара барысында арнайы мақсаттағы жасақ қызметкерлері полиция қызметінің ерекшеліктерімен таныстырып, қорғаныш шлемдері мен арнайы құрал-жабдықтарды көрсетті. Сондай-ақ балаларға қызметтік міндеттерді орындау кезінде қолданылатын дрондардың мүмкіндіктері таныстырылып, олардың жұмыс істеу тәртібі көрсетілді.

Кездесу балалар үшін танымдық әрі қызықты форматта жалғасты. Іс-шара аясында эстафеталық жарыс ұйымдастырылып, жас қатысушылар шапшаңдық, ептілік және ұйымшылдықтарын көрсетті. Жарыс қорытындысы бойынша балаларға естелік сыйлықтар табысталды.

Мұндай кездесулер өскелең ұрпақтың қауіпсіздік мәдениетін қалыптастыруға, құқықтық сауаттылығын арттыруға және полиция қызметіне деген қызығушылығын нығайтуға бағытталған.